Ampyang Maulid

Tradisi Ampyang

 

Ampyang Maulid  inggih punika salah sawijining pahargyan ing Kabupaten Kudus ingkang dipun tumindhakaken dening bebrayan agung Desa Loram Kulon kangge mengeti miyosipun Nabi Muhammad SAW utawi maulid Nabi Muhammad SAW. Ampyang maulid dados salah satunggaling budaya ingkang dipunuri-uri ngantos samangke lan dipunpengeti saben tanggal 12 Robi’ul Awwal. Para peserta pahargyan punika mushola-mushola wonten ing dukuh ingkang mapan wonten ing Loram Kulon. Ngantos samangke tradisi pahargyan punika langkung ngrembaka  saengga para peserta langkung nambah, wiwit saking madrasah-madrasah ugi organisasi sarta lembaga-lembaga sakubenganipun Loram Kulon.

Ampyang maulid punika saking 2 tembung, inggih Ampyang lan Maulid. Miturut sesepuh Desa Loram Kulon, Ampyang punika jenis krupuk saking glepung, awujud bunder lan warna-warni. Dene tembung maulid punika saking basa Arab ingkang ateges miyosan. Pramila, tembung ampyang menawi dipun gathukake kaliyan tembung maulid dados Ampyang Maulid ingkang ateges panganan ingkang dipun tata ing sawijining wadah kanthi mbedani (unik) lan dipunusung dening para warga kangge mengeti miyosipun Nabi Muhammad SAW wonten Masjid Wali Loram Kulon.

Dene dening warga Desa Loram Kulon wonten wekdal punika krupuk punika dipun dadosaken hiasan sawijining panggenan panganan ingkang awujud persegi papat ingkang dipun damel saking pring, kayu kanthi wujud bentuk miniature Masjid, Musholla, Omah adat lan sanes-sanesipun ingkang sisih pojok dipun paring hiasan spesifik utawi khas kembang “Jambul” inggih pring ingkang dipun serut ngantos mlungker-mlungker lajeng dipun paring werna ingkang endah.